Трансфармацыя паўсядзённага жыцця беларускіх сельскіх дзяўчат у Заходнім Палессі ў 20-80 гг. ХХ ст.

Abstract

Дысертацыя прысвечана выяўленню спецыфікі трансфармацыйных працэсаў у паўсядзённым жыцці беларускіх сельскіх дзяўчат у Заходнім Палессі ў 20–80-я гг. ХХ ст. Упершыню ў айчыннай этналогіі праведзена спецыяльнае даследаванне дзявочай паўсядзённасці з прымяненнем антрапалагічнага падыходу на аснове асабістых палявых матэрыялаў аўтара. Сістэмна разгледжаны канцэпт «дзявоцтва», дадзена вызначэнне паняццяў «дзявочая паўсядзённасць» і «трансфармацыя дзявочай паўсядзённасці». Раскрыта сутнасць змен становішча дзяўчат у сям'і, прааналізавана дынаміка іх грамадскіх статусных і ролевых пазіцый, вызначаны характэрныя рысы трансфармацыі культуры дашлюбных паводзін, выяўлены асаблівасці культуры жыццезабеспячэння і яе ўплыву на паўсядзённасць. Асаблівая ўвага нададзена дзявочай субкультуры, рукапіснай культуры (спеўнікі, сшыткі пажаданняў, дзённікі), формам баўлення часу і працоўным стратэгіям. Вынікі могуць быць выкарыстаны ў навучальным працэсе пры падрыхтоўцы курсаў па этналогіі, гісторыі паўсядзённасці, культурнай антрапалогіі, а таксама для арганізацыі палявой працы студэнтаў.